بنگلادیش کے نیشنل پاور گرڈ میں خرابی کی وجہ سے ملک کا بیشتر حصہ بجلی سے محروم ہوگیا۔بنگلادیش پاور ڈویلپمنٹ بورڈ کے حکام نے بتایا کہ ملک کے مشرقی حصے میں کسی جگہ ٹرانسمیشن لائن میں خرابی ہوئی۔حکام کے مطابق اس خرابی کے باعث تمام پاور پلانٹس ٹرپ کرگئے جس کے باعث دارالحکومت ڈھاکا سمیت دیگر بڑے شہروں کے لیے بجلی منقطع ہوگئی اور 14 کروڑ افراد بجلی سے محروم ہوگئے۔
انہوں نے بتایا کہ ماہرین کی جانب سے یہ تعین کرنے کی کوشش کی جارہی ہے کہ یہ خرابی کہاں ہوئی اور اس کی وجہ کیا ہے، مگر بجلی کی بحالی میں کئی گھنٹے لگ سکتے ہیں۔بنگلادیشی حکومت نے درآمدات کی لاگت میں کمی لانے کے لیے پہلے ہی ڈیزل پر چلنے والے تمام پاور پلانٹس بند کردیے تھے جس کے باعث سے بجلی کی قلت ہوگئی تھی۔ڈیزل سے چلنے والے پلانٹس کی بندش سے بنگلادیش کو 1500 میگاواٹ بجلی کی کمی کا سامنا ہوا۔
