لطیفوں کا مقصد مذاق کرنا ہوتا ہے، کسی کی توہین کرنا نہیں ہوتا اور کامیڈینز کو اس فرق کو سمجھنا پڑے گا‘اداکارہ
کراچی (این این آئی)ماڈل و اداکارہ ازیکا ڈینیئل نے دعویٰ کیا ہے کہ ان کے ساتھ ایک کامیڈی شو کی شوٹنگ کے دوران توہین آمیز مذاق کیے گئے، جس وجہ سے وہ روتی ہوئی پروگرام چھوڑ کر چلی آئیں۔

ازیکا ڈینیئل کے نام سے بنے ٹوئٹر اکائونٹ پر کی جانے والی ٹوئٹ میں دعویٰ کیا گیا کہ اداکارہ کے ساتھ مذاق کے نام پر توہین آمیز گفتگو کی گئی۔ازیکا ڈینیئل اپنی مختصر ٹوئٹ میں بتایا کہ انہیں ایک شو کو شوٹنگ کے دوران روتے ہوئے اس لیے چھوڑنا پڑا، کیوں کہ کچھ کامیڈین مزاح نگاری اور کسی کی تضحیک میں کوئی فرق نہیں سمجھتے۔اداکارہ نے لکھا کہ انہیں آنسوئوں کے ساتھ لوگوں سے بھر ہوئے سیٹ کو چھوڑنا پڑا۔انہوں نے لکھا کہ لطیفوں کا مقصد مذاق کرنا ہوتا ہے، کسی کی توہین کرنا نہیں ہوتا اور کامیڈینز کو اس فرق کو سمجھنا پڑے گا۔ازیکا ڈینیئل کی مذکورہ ٹوئٹ کو دیگر سوشل میڈیا پلیٹ فارمز نے بھی شیئر کیا اور لوگوں نے ان سے شو کا نام بتانے کا کہا۔

زیادہ تر لوگوں نے ان کی بات سے اتفاق کیا اور لکھا کہ آج کل کے شوز میں شریک زیادہ تر کامیڈین تھیٹرز ڈراموں سے آئے ہوئے ہیں اور تھیٹرز کا کیا حال ہے، یہ ہر کوئی جانتا ہے۔لوگوں نے ازیکا ڈینیئل کے ساتھ مذاق کے نام پر کی جانے والی توہین آمیز گفتگو کی مذمت بھی کی اور ان کے ساتھ ہمدردی کا اظہار بھی کیا۔